रामधुनी । प्रदेश नम्बर एकको मुटुको रुपमा परिचित सुनसरीको इटहरीमा अत्याधुनिक सुविधा सम्पन्न इपी ल्यान्ड एण्ड वाटर पार्क पार्क सञ्चालनमा आएको छ ।
इटहरी २ को प्रसिद्ध पिकनिक स्पट तालतलैयाको छेउमै ६ बिघा क्षेत्रफलमा ३० करोडको लगानीमा इपी ल्यान्ड एण्ड वाटर पार्क सञ्चालनमा आएको हो। गत फागुन १७ गते सस्कृति पर्यटन तथा नागरिक उड्यनमन्त्री भानुभक्त ढकालले उद्घाटन गरेसँगै पार्क सञ्चालनमा अएको हो ।
उद्घाटन समारोहलाई सम्बोधन गर्दै मन्त्री ढकालले राम्रो उदेश्यका साथ समाजलाई अग्रणी बनाउन निर्माण भएको इपी ल्यान्ड एण्ड वाटर पार्कले यस क्षेत्रमा सकारात्मक सन्देश दिने बताए ।
‘पूर्वान्चल पर्यटनको गतिमा अग्रगतिमा दौडनुपर्ने भएपनि पर्यटनको काम भएको छैन,’ उनले भने, ‘न हाम्रो क्षेत्रमा पर्यटनको विकास भयो, न ठूला होटलहरु नै स्थापना गर्न सकियो ।’ उनले प्रदेश १ मा पर्यटनको सम्भाव्यता धेरै भएपनि पर्यटकीय क्षेत्रमा विकासका काम आरम्भ नभएको तर्क गरे ।
‘यहाँ समय र सम्भाव्यता भएपनि विकासको आरम्भ भएको पाईदैँन तर इटहरी जस्तो ठाउँमा यो फनपार्ककको स्थापना हुनु सुखद् हो,’ मन्त्री ढकालले भने, ‘भविष्यमा अरुलाई पनि काम गर्न उत्प्रेरित गर्ने र यसलाई निरन्तरता दिनु आवश्यक छ ।’
उनले पर्यटनको क्षेत्रमा लगानी गर्न सरकार तयार रहेकाले पर्यटनको अवलोकन गर्न आवश्यक रहेको बताए । निजी क्षेत्रलाई सरकारले नीतिगत सुझाव दिदैँ यस क्षेत्रको विकासमा आफूहरु गम्भीर रहेको उनको भनाई थियो ।
पूर्व एआइजी कृष्ण बस्नेत, पूर्व डीआइजी ज्ञानविक्रम शाह, इटहरी उद्योग वाणिज्य संघका अध्यक्ष भीमबहादुर पौडेल र काठमाडौंको वु पी ल्यान्ड एम्युजमेन्ट वाटरपार्कका सञ्चालक जगतबहादुर बस्नेतको संयुक्त लगानी निर्माण भएको पार्क कोरोना कहरका कारण एक वर्षपछी सञ्चालनमा आएको हो ।
‘हामीले गत वर्षको चैत महिनामै सबै काम सकेका थियौं, पार्कका सञ्चालक तथा उद्योग वाणिज्य संघ इटहरीका अध्यक्ष भिम पौडेलले भने , ‘तर लामो लकडाउन र कोभिड कहरका कारण पार्क सञ्चालनमा ल्याउन सकिएन।’ उनका अनुसार पार्कमा पानीसँग खेल्ने अत्याधुनिक वाटर स्लाइड ८ वटा राखिएका छन्। एक स्लाइडमा एक पटकमा बढीमा ८ जनाले खेल्न सक्नेछन्। दिनभरिमा ५ हजारले मनोरञ्जन लिन सक्नेछन्।
पार्कमा एकै पटक ६ सय मानिस अटाउने एक वेभ पुल राखिएको छ। यस पुलमा बसेपछि समुद्रको छालमा बसेकोजस्तो आनन्द आउँछ। त्यस्तै जुरासिक पार्क यहाँको अर्को सुन्दर विशेषता हो। यहाँ बोटिङ गर्न सकिन्छ र बोटिङ गर्दै डाइनोसर लगायतका लोप भइसकेका प्रजातिका जनावरको अवलोकन गर्न सकिन्छ।
पार्कभित्र ४ वटा छुट्टाछुट्टै रेस्टुरेन्ट सञ्चालनमा आएका छन्। एउटा बार्बिक्यु र अर्को लन्च वा डिनरका लागि फाइन डाइनिङ राखिएको छ। त्यस्तै फास्टफुडका लागि अर्को रेस्टुरेन्ट बनाइएको छ। यसबाहेक इन्डियन फुडकोर्ट र आइसक्रिम पार्लरको समेत व्यवस्था रहेको छ। पार्कमा जिपलाइन टावर बनाइएको छ। त्यस्तै पार्कमा रक क्लाइम्बिङ ९चट्टानमा चढ्ने० स्थान पनि निर्माण गरिएको छ।
