ताप्लेजुङ । ताप्लेजुङ दोभान बजारमा हिजो भएको आगलागीका पीडितलाई सरकारले ५ लाख रुपैयाँ दिने भएको छ । गृहमन्त्री रामबहादुर थापा बादलले अग्नि पीडितका तर्फबाट ज्ञापनपत्र बुझ्दै पीडितलाई तत्काल १५ हजार राहत उपलब्ध गराइएको र दीर्घकालीन पुनःस्थापनाका लागि कार्यविधि सच्याएर ५ लाख दिने बताए ।
त्यस्तै, नेपाल रेडक्रस सोसाइटी ताप्लेजुङ शाखाले विभिन्न भाडाकुँडा सहितका सामग्री र उद्योग वाणिज्य सङ्घले २० केजी चामल, नुन, तेललगायतका सामग्री वितरण गरेको छ । आगलागी हुँदा कम्तीमा ४९ घर जलेका छन् ।
५५ परिवार पूर्ण र थप २२ परिवार गरी ७८ घर परिवार विस्थापित भएका निमित्त प्रमुख जिल्ला अधिकारी गायत्रा अधिकारी खड्काले जानकारी दिइन् । ताप्लेजुङमा पटक पटक आगोलागी भएर ठूलो धनजनको क्षति हुने गरेको छ । आगलागिबाट एक अबै बराबरको प्रारम्भिक अनुमान गरिएको छ ।
ताप्लेजुङमा भएका आगलागिका घटना
१९९४, १९९५ साल र २००६ सालमा सदरमुकाम स्थित हालको वीरेन्द्रचोक क्षेत्रमा आगलागी भएको थियो । २०१३ सालमा ७ वटा घर जलेका थिए । २०१८ सालमा कांग्रेसले गरेको सशस्त्र विद्रोहमा जिल्ला अदालत ताप्लेजुङ तथा न्यून संख्यामा रहेका सरकारी कार्यलयमा आगजनी गरी कारागार समेत तोडेर कैदी बन्दीलाई छाडिएको बताइन्छ ।
२०३५ साल जेठमा ४ चार घर जलेर नष्ट भएका थिए । २०६० चैत्र १५ गते वीरेन्द्रचोक क्षेत्रमा आगलागी हुँदा ४५ घर जलेर नष्ट भएका थिए । २०६९ साल माघ २६ गते शेर्पाटोलमा आगलागी हुँदा ८ घर जलेर नष्ट भए, ती घरमा बस्ने १८ परिवार विस्थापित भएका थिए ।
२०७० साल कात्तिक १८ गते टुक्रेबजार क्षेत्रमा आगलागी हुँदा ५ घर जलेर नष्ट भए र अग्नि नियन्त्रणका लागि भत्काइएका घरमा बस्नेसमेत १७ परिवार विस्थापित भएका थिए । २०७१ साल चैत ९ गते फुङलिङ ४ तोक्मेडाँडा क्षेत्रमा आगलागी हुँदा ३७ घर जलेर नष्ट भए ७ घर अग्नि नियन्त्रणका लागि भत्काइएका थिए ।
यी समेत ४४ घर नष्ट हुँदा १४५ परिवार विस्थापित भएका थिए । २०७७ बैशाख १९ गते पुरानो बैंक लाइन, ट्याक्सी काउन्टर क्षेत्रमा आगलागी हुँदा ७ घर जलेर नष्ट भए । एउटा घर अग्नि नियन्त्रणका लागि भत्काइयो । ती आठ घरमा बस्ने २९ परिवार विस्थापित भएको तथ्यांक छ ।
