विराटनगर । नेपाली कांग्रेसका युवा नेताहरुले राष्ट्रिपति कुनै व्यक्ति नभएर संस्था भएकाले गलत काम हुने बताएका छन् । उनिहरुले संविधानको रक्षा गर्नुपर्नेमा सबै नेपाली लाग्नुपर्नेमा जोड दिएका छन् ।
कांग्रेस विराटनगर महानगर समितिले आयोजना गरेको अन्तरक्रिया कार्यक्रममा नेता गगन थापाले प्रधानमन्त्री र राष्ट्रपतिको सेटिङमा संविधानको हत्या भएको आरोप लगाए । राजनीतिक दलले नागरिकको अवस्थाबारे बुझ्नुपर्ने समयमा देशको व्यवस्था रक्षामा जुट्नुपर्ने स्थिति सिर्जना भएको उनको भनाई छ ।
कांग्रेसका युवा नेता गुरुराज घिमिरेले प्रचण्ड–माधव नेपाल समूह मात्रै सडकमा निस्किँदा प्रधानमन्त्री घेरिसकिएको बताउँदै कांग्रेस निस्केका दिन बालुवाटार छोड्नुपर्ने अवस्था आउने दाबी गरे ।
नेता प्रदीप पौडेलले राजा हुँदा ज्ञानेन्द्र शाहबाट दीक्षित कानुन व्यवसायीले प्रधानमन्त्रीको कदमलाई सही भनिरहेको दाबी गरे । उनले कांग्रेस अहिलेको कदमको विषयमा प्रष्टसँग बोलिसकेको बताउँदै अदालतसँग भर परेका कारण सडकमा निस्किन नसकेको पनि प्रष्टीकरण दिए ।
कार्यक्रममा बोल्दै संविधानविद् डा.विपिन अधिकारीले पनि लोकतन्त्रको पक्षमा उभिने राजनीतिक दलले संविधानको रक्षा गर्नुपर्नेमा जोड दिए ।
तस्विरः लोकेन्द्र तिम्सिना
