इटहरी । प्रधानमन्त्री के पि शर्मा ओलीले संसद विघटन गरे यता देखि संघियताको खारेजीको माग समेत तिव्र रुपमा उठ्न थालेको छ । आगामी पुष २२ गते बुधबार इटहरीमा राजसंस्था र हिन्दु राज्यको माग राख्र्दै वृहत्त कार तथा मोटरसाईकल र्यालीको आयोजना हुने भएको छ ।
सोमबार पत्रकार सम्मेलन गर्दै पुर्वाञ्चलबासी नेपाली जनताको नाममा कार र्याली आयोजना गर्न लागेको आयोजकले जानकारी दिएको छ ।
इटहरी देखि विराटनगर सम्म आयोजना गरिने कार तथा मोटरसाईकल र्यालीका विषयमा जानकारी गराउन आयोजना गरिएको पत्रकार सम्मेलनमा आयोजकका तर्फबाट रामु पोखरेलले राजसंस्था र सनातन धर्म सहितको हिन्दु अधिराज्यका लागि राजनैतिक दल भन्दा माथि उठेर सहभागी हुन सबैलाई आग्रह गरेका छन् ।
मुलुक संकटमा रहेको अवस्थामा दल भन्दा माथि उठेर राजसंस्था सहित हिन्दु राज्य कायम गर्दै संघियताको खारेजीका लागि दवाव दिन र्यालीको आयोजना गरिन लागेको पोखरेलले बताए ।
पत्रकार सम्मेलनमा पत्रकारहरुको जवाफ दिदै आयोजकका तर्फबाट संघियता नेपालका लागि उपयुक्त नभएको संसद विघटनले समेत पुष्टि गरी सकेको बताउदै ।
विदेशीहरुको इसारामा केही नेताहरुका बलमा जबरजस्ती राजसंस्था , सनातन हिन्दु राज्य खारेज गरेर गणतन्त्र स्थापना गरिएपनि गणतन्त्र छोटो समयमै असफल भई सकेको दावी गरे । र्याली ऐतिहासिक हुने आयोजक सुरज कडेलले दावी गरे ।
रामु पोखरेल , सुरज कडेल र युगप्रिय निरौलाले पत्रकारहरुको प्रश्नको जवाफ दिएका थिए। पत्रकार सम्मेलनमा दिपेन्द्र कार्की , आकास सुब्बा , रमा बास्तोला , युगप्रिय निरौला , गिता नेम्वागं, दुर्गा लामा लगायतको सहभागिता रहेको थियो ।
