रामधुनी। पूर्वपश्चिम राजमार्ग अन्तर्गत बर्दिया राष्ट्रिय निकुञ्जको कुँवाभार नजिक पाटे बाघले एक महिलालाई बेपत्ता पारेको छ ।
मोटरसाइकलमा सवार कैलालीको लम्किचुहा नगरपालिकाकी नन्दकला थापालाई बाघले झम्टेर बेपत्ता पारेको हो ।
शुक्रबार राती नेपालगन्जबाट कैलाली जाँदै गरेको आमा छोरा सवार मोटरसाइकलको पछाडी बसेकी थापालाई बाघले झम्टिएको थियो । मोटरसाइकल चालक महिलाका छोरालाई सामान्य चोट लागेको छ ।
नेपाली सेनाले हात्तीको सहायताबाट महिलाको खोजी गरिरहेको बर्दिया निकुञ्जका प्रमुख संरक्षण अधिकृत विष्णुप्रसाद श्रेष्ठले जानकारी दिएका छन् ।
त्यस्तै बाराको जितपुर सिमरा उपमहानगरपालिका आधारभार जंगल क्षेत्रमा कारको ठक्करबाट एउटा पाटे बाघको मृत्यु भएको छ । हेटौंडाबाट सर्लाही जाँदै गरेको बा १६ च ८११ नम्बरको कारले बाटो काट्दै गरेको बाघलाई ठक्कर दिदा बाघको मृत्यु भएको बारा प्रहरीले जनाएको छ ।
कार चालक सर्लाहीका ५० वर्षीय अजय मिश्र र बाघलाई प्रहरीले राष्ट्रिय निकुञ्जको जिम्मा लगाएको बारा प्रहरीले जनाएको छ ।
