रामधुनी । पछिल्ला केही समय राजतन्त्रको नारा बढी नै लाग्दै आएको छ । मानिसहरु नेपालको झण्डा बोकेर राजतन्त्रको समर्थनमा सडकमै उत्रिन थालेका छन् ।
गणतन्त्र स्थापना भएको १२ वर्ष पूरा भयो । यस अविधको सुरुवाती समयमा छिटफुट राजतन्त्रका नारा लागे पनि दोस्रो संविधानसभाको निर्वाचनपछि बनेको संविधान लागू भएपछि भने राजतन्त्रवादीहरु सडकमै खासै प्रदर्शनमा उत्रिएका थिएनन् ।
तर, २४० वर्ष लामो राजतन्त्रात्मक शासन व्यवस्था ढालेर २०६५ सालमा आएको गणतन्त्रविरुद्ध हाल सयौँ मानिस राजतन्त्र फर्काउने भन्दै सडक प्रदर्शनमा उत्रिएका हुन् । गणतन्त्र स्थापनापछि पनि नागरिकको माग पूरा नभएको भन्दै उनीहरु आक्रोशित बन्दै गएका छन ।
कतिपयले त प्रमुख राजनीतिक दलले देशलाई भ्रष्टाचारको दलदलमा डुबाउन खोजेको भन्दै राजतन्त्रको पक्षमा देशभर अभियान चलाउन थालेका छन् । राजतन्त्र पुनर्स्थापनाको माग गर्नेको प्रदर्शन बढ्दै गइरहेका बला सरकारका प्रवक्ता सञ्चार तथा सूचना प्रविधिमन्त्री पार्वत गुरुङले अहिले राजनीतिक व्यवस्था र सरकारविरुद्ध प्रतिक्रियावादीहरुले टाउको उठाउन खोजेको आरोप समेत लगाएका छन् ।
यसैगरी जनता समाजवादी पार्टीका अध्यक्ष तथा पूर्वप्रधानमन्त्री डा बाबुराम भट्टराईले गणतन्त्रको भात पाक्न ढिला भएकाले राजतन्त्रको गोबर नखान भन्दै सामाजिक सञ्जालबाट आग्रह समेत गरेका छन् । राजतन्त्रवादीहरुको बढ्दै गएको क्रियाकलापप्रति सत्तापक्षबाट लगातार अभिव्यक्ति आए पनि प्रमुख प्रतिपक्षी दल कांग्रेस लगाएत अन्य केही दलले भने, यसबारे खासै टिप्पणी गर्न भ्याएका छैनन् ।
हुन त राप्रपाले भने, राजतन्त्र फालेदेखि नै राजाको समर्थन नै गरेको थियो, तर उसको आवाज सुनिदैन थियो । अहिले पनि देशभर राजतन्त्रको पक्षमा भइरहेको प्रदर्शनको विषयमा पार्टीको औपचारिक निर्णय भने नभएको राप्रपाका प्रवक्ता मोहन श्रेष्ठले बताउनुभयो ।
राजतन्त्रको पक्षमा भएको प्रदर्शनमा कुनै पनि राजनीति दलको सहभागिता नभएको राजतन्त्र फर्काउ अभियानको नेतृत्व गरिरहेकाहरुले बताँएका छन् । यसरी हेर्दा नागरिक नै स्व स्फूर्त रुपमा सडकमा आउनुमा अहिलेको सरकारको डेलिभरी नपुगेको हो र त्यसको विरोधमा उत्रिएका हुन् । यो विरोधलाई राजनितिक दललाई सोचनिय बनाउन जरुरी छ ।
