इलाम । इलाम नगरपालिकाले सर्वसाधरणलाई स्वास्थ्य कार्यलयले कोभिड लक्षित जारी गरेको स्वास्थ्य मापदण्ड पालना नगरे कारबाही गर्ने भएको छ ।
पछिल्लो समय कोरोना भाइरस सङ्क्रमण फैलिने क्रम बढेसँगै स्वास्थ्य कार्यलयले जारी गरेको मापडण्ड पालना नगर्नेलाई नगरपालिकाले कार्वाही गर्ने भएको हो ।
हाटबजार, यातायात सञ्चालनसँगै भिड बढेकाले कोरोनाको जोखिम पनि उत्तिकै बड्दैगएकाले हिँडडुलका क्रममा जारी गरिएका मापदण्ड सबै नागरिकलाई पालना गर्न नगरपालकाले सूचना जारी गरेको प्रशासकीय अधिकृत राम शाहले जानकारी दिए ।
उनले, पालिकाको आग्रहलाई अटेर गरे प्रचलित सङ्क्रामक रोग नियन्त्रण ऐन २०२० अनुसार कारबाही हुने बताए । सङ्क्रमणको लक्षण देखिएमा स्वास्थ्यकर्मीसँग सल्लाह लिन समेत आग्रह गरिएको बताए ।
जोखिमका आधारमा स्वाब सङ्कलन गरिएका सबै व्यक्ति आफ्नो परीक्षण रिपोर्ट नआएसम्मका लागि होम आइसोलेशनमा बस्न नगरपालिकले सबैलाई आग्रह गरेको छ । आइसोलेशनमा बसेको समय नियम पालन गरेर बस्ने र नियम थाहा नभए नगरपालिकाको वडा कार्यलयमा सम्पर्क गर्न भनिएको छ ।
ऐनमा रोग नियन्त्रण ऐन २०२० अन्तर्गत दिइएको आदेशलाई अपहेलना गर्ने व्यक्तिमाथि एक महिनासम्म कैद वा एक सय रुपैयाँ जरिबाना अथवा दुवै सजाय हुने व्यवस्था छ ।
