नेपालगञ्ज । पछिल्लो समय देशका विभिन्न भागमा राजसंस्था र हिन्दू राज्यको पक्षमा ¥याली तथा प्रदर्शन भइरहेका छन् ।

यसैक्रममा शनिबार नेपालगञ्जमा बृहत मोटरसाइकल ¥याली तथा प्रदर्शनी भएको छ । प्रदर्शनकारीहरूले ‘राजसंस्था जिन्दावाद’, ‘हाम्रो राजा हाम्रो देश, प्राणभन्दा प्यारो छ’, ‘हिन्दू राष्ट्र कायम गर’, ‘राजा ल्याऊँ, देश बचाऊँ’ जस्ता नारा लगाउँदै ठूलो संख्यामा नेपालगञ्ज बजार परिक्रमा गरेका थिए ।

नेपालगञ्ज बागेश्वरी मन्दिर परिसरबाट निस्केको ¥याली शहीद सेतु विकचोक, पुष्पलालचोक, वीरेन्द्रचोक, बिपीचोक, गणेशमानचोक, त्रिभुवनचोक हुँदै बागेश्वरी मन्दिर भएर ¥याली वीरेन्द्रचोकमा आएर कोणसभामा परिणत भएको थियो ।
कोणसभालाई सम्बोधन गर्दै नेपालगञ्ज उपमहानगरपालिकाका मेयर एवं राप्रपाका नेता डा. धवलशमशेर राणाले हिन्दू राष्ट्र र राजसंस्था फिर्ता ल्याउनका लागि बलिदानी दिन तयार रहनुपर्ने बताउनुभयो । ‘गुमेको शक्ति फिर्ता ल्याउन यतिले मात्रै हुँदैन, सबै जना बलिदानी दिन तयार रहनुपर्छ । देशमा बढ्दै गएको जनलहरलाई शक्तिमा बदल्नुपर्छ’, राणाले भन्नुभयो । डा. राणाले धर्म, संस्कृति र परम्परालाई जोगाउन सबै जना पार्टीभन्दा माथि उठ्नुपर्ने बताउनुभयो ।

सभामा बोल्दै सहभागीहरूले देशमा भ्रष्टाचार मौलाइरहेको, बेथिति बढिरहेको, राष्ट्रियतामा आँच आइरहेको, बलात्कार, हत्या हिंसा जस्ता घटनाहरू दिन–प्रतिदिन बढ्दै गइरहेकाले यसको न्यूनीकरणका लागि राजतन्त्र फर्काउन आवश्यक रहेको बताएका थिए ।

देशका प्रमुख राजनीतिक पार्टीभित्र आन्तरिक विवाद र सत्ताको खिचातानी चलिरहेको बेला देशका विभिन्न ठाउँमा यतिबेला ‘राजा आऊ, देश बचाऊ’ भन्दै दिनहुँ प्रदर्शन हुन थालेका छन् । गत बुधबार पोखरा र जनकपुरमा बृहत प्रदर्शन भएका थिए । यस्तै, सुदूरपश्चिम प्रदेशको धनगढी, विराटनगर र बुटवलमा पनि बृहत् ¥यालीसहित ‘राजा आऊ देश बचाऊ’को नारा लागेको थियो ।

अहिलेको गणतान्त्रिक व्यवस्था असफल भएको आरोप लगाउँदै गणतन्त्रले विकास र समृद्धि ल्याउन नसकेको र भ्रष्टाचार, अनियमितता, कालोबजारी बढेकाले यसविरुद्ध प्रदर्शन गरिएको विभिन्न ठाउँमा भएका प्रदर्शनमा सहभागी प्रदर्शनकारीहरूले बताएका छन् ।

राजनीतिक दलहरूले जनचाहनाअनुरूप काम नगर्दा देशका विभिन्न ठाउँमा यस्ता प्रदर्शन हुन थालेका हुन् । राजतन्त्र तथा हिन्दू राष्ट्रको माग गर्दै हजारौं युवा सडकमा उत्रिन थालेका छन् । गणतान्त्रिक व्यवस्था असफल भएको आरोप लगाउँदै गणतन्त्रले विकास र समृद्धि ल्याउन नसकेको र भ्रष्टाचार, अनियमितता, कालोबजारी बढेकाले यसविरुद्ध प्रदर्शन गरिएको उनीहरूले बताउँदै आएका छन् । आजको हिमालय टाइम्समा खबर छ ।

प्रतिक्रिया छाड्नुहाेस्

Please enter your comment!
Please enter your name here