महोत्तरी । ६ वर्षीय बालिका गुलाब साह खातुनको हत्या घटनाले महोत्तरीको बार्दिबासमा स्थानीयले प्रर्दशन जारी राखेका छन् ।
दोषीलाई कारवाहीको माग गर्दै भएको आन्दोलनमा प्रहरीको गोली लागेर संजय न्यौपानेको ज्यान गएपछि आन्दोलन थप चर्किएको छ । बर्दिबास सेवा समितिले आयोजना गरेको सर्वपक्षीय बैठकले आन्दोलनका घाइतेलाई उपचार तथा क्षतिपूर्ति दिनुपर्ने, आन्दोलनमा गोली चलाउन निर्देशन दिनेलाई तुरुन्त निलम्बन गरेर बर्खास्त गर्नुपर्ने, बालिकाको हत्यारालाई कडा कारवाही हुनुपर्ने माग अघि सारेको छ ।
उनीहरुले मृतकलाई सहिद घोषणा गर्न पनि माग गरेका छन् । माग पूरा गर्न सरसकारसँग वार्ता गर्ने वार्ता टोलीसमेत गठन भएको छ । नेपाली कांग्रेसका नेता चिरञ्जिवी हमालको संयोजकत्वमा ११ सदस्यीय वार्ता टोली गठन भएको हो । प्रदर्शनकारीले बिहानैदेखि पूर्व पश्चिम राजमार्ग ठप्प पारेका छन् ।
प्रदर्शनकारीले राजमार्गमा टायर बालेर बाटो अवरुद्ध गरेका हुन् । घटनाको विषयमा तनाव बढ्दै गएपछि बर्दिबासमा निषेधाज्ञा भने, जारी भएको छ । तर, स्थानीयले निषेधाज्ञाका विच पनि प्रर्दषन जारी राखेका छन् । जिल्ला प्रशासन कार्यालय महोत्तरीले बुधबार बिहान ९ बजेदेखि बर्दिबासमा निषेधाज्ञा गर्ने निर्णय गरेको हो ।
प्रमुख जिल्ला अधिकारी कृष्णबहादुर कटुवालका अनुसार निषेधाज्ञा बिहिबार बिहान ६ बजेसम्म जारी रहने छ । गत आइतबारबाट हराएकी महोत्तरीको बर्दिबास १४ की ६ वर्षीय गुलाब साह खातुनको शव सोमबार मध्यराति भेटिएको थियो । बालिका वलात्कारपछि हत्याको आरोपमा गौशाला–५ का अरुण साहलाई प्रहरीले पक्राउ गरिसकेको छ ।
