एजेन्सी । कोरोना भाइरस बाट आक्रान्त विश्व समुदायलाई राहत दिने खबर आउन थालेका छन । एक पछि अर्को गर्दै कोरोना भाइरस बिरुद्यका खोपको सफलताका खबरहरु आएका हुन ।
अमेरिकी कम्पनी फाइजरले जर्मन बायोएनटेकसँग मिलेर विकास गरेको खोप ९५ प्रतिशत प्रभावकारी देखिएको बताइएको छ । अमेरिकी कम्पनी मोडर्नाले विकास गरेको खोप ‘एम आर एन ए को प्रभावकारिता ९४.५ प्रतिशत रहेको बताएको छ ।
रुसी खोप स्पुतनिक भी पनि ९२ प्रतिशत प्रभावकारी देखिएको खबर आएको छ । विश्व स्वास्थ्य संगठन (डब्ल्यूएचओ)का अनुसार अहिलेसम्म १२ वटा खोपको तेस्रो अर्थात् अन्तिम चरणको क्लिनिकल ट्रायल भइरहेको छ ।
२५ वटा खोप दोस्रो र २० वटा खोप, पहिलो चरणको क्लिनिकल ट्रायलकै क्रममा छन् । फाइजर र बायोएनटेकले संयुक्त रुपमा विकास गरेको खोपको अन्तिम चरणको मानव परीक्षणको नतिजामा ९५ प्रतिशत प्रभावकारी पाइएको बताइएको छ ।
आपतकालीन प्रयोगका लागि अनुमति मिलेपछि अबको केही महिनामा कोरोनाविरुद्धको खोप बजारमा पठाउन सकिने ती कम्पनीको दाबी छ । यो वर्षको अन्त्यसम्ममा पाँच करोड मात्रा र सन् २०२१ को अन्त्यसम्ममा एक अर्ब ३० करोड मात्रामा खोप आपूर्ति गर्नसक्ने निर्माता कम्पनी फाइजरले बताएको छ ।
अर्को अमेरिकी कम्पनी मोडर्नाले विकास गरेको खोप पनि ९४.५ प्रतिशत प्रभावकारी देखिएको कम्पनीको दाबी छ । उसले यस वर्षको अन्तिमसम्म दुई करोड डोज खोप तथा २०२१ का लागि ५० करोडदेखि एक अर्ब डोजसम्म खोप निर्माणको लक्ष्य लिएको छ ।
तेस्रो चरणको मानव परीक्षण नगर्दै रुसले मान्यता दिएको खोप ‘स्पुतनिक भी’ पनि तेस्रो चरणको मानव परीक्षणमा सफल भएको र ९२ प्रतिशत प्रभावकारी देखिएको बताइएको छ ।
चीनमा सिनोर्फमले विकास गरेको दुई र सिनोभ्याकको एक गरी तीन वटा खोप तेस्रो चरणको मानव परीक्षणमा छन् । तीनवटै खोपलाई चीनले आपतकालीन प्रयोगको लागि अनुमति दिइएको छ ।
सिनोर्फमका अनुसार अहिलेसम्म चीनमा १० लाख मानिसले खोप लिइसकेको र चीनमा खोप लगाएर बाहिर गएका कर्मचारी, विद्यार्थीहरू र कूटनीतिज्ञलाई संक्रमण नदेखिएको दाबी गरीएको छ । यो खोपको कुनै नकारात्मक असर नदेखिएको बताइएको छ ।
तर चिनियाँ खोपहरूले अन्तिम चरणको मानव परीक्षणको नतिजा भने सार्वजनिक गरेका छैनन् । अन्तिम चरणको परीक्षणमा रहेका खोपहरू सन् २०२० को अन्त्यसम्म वा २०२१ को सुरुवातमा बजारमा आउने देखिएको जनस्वास्थ्य विज्ञहरूले बताएका छन् ।
