काठमाडौं । उत्तरको छिमेकी मुलुक चीनले नेपालको भूमि मिचेको भन्दै शनिबार राजधानीको माइतीघरमा प्रदर्शन गरेको छ ।
स्वतन्त्र युवाको समूहले प्रदर्शनमा ‘गो ब्याक चाइना’, ‘नेपाली भूमि मिच्न पाइँदैन’, ‘चिनियाँ विस्तारवाद मूर्दावाद’ जस्ता लेखेका प्लाकार्ड बोकेर प्रदर्शन गरेका थिए ।
स्वतन्त्र नागरिक समूहको नाममा प्लाकार्ड बोकेका उनीहरूले नेपालको भू–भाग चीनले मिचेको आरोप लगाउँदै फिर्ता गर्न माग गरेका थिए । प्रदर्शनको क्रममा प्रहरीले हस्तक्षेप गरेको थियो । प्रदर्शनमा आएका युवाहरूले नेपालको उत्तरी क्षेत्रमा चीनले आफ्नो रवैया देखाउँदै नेपाली भूमि मिचेको भन्दै फिर्ता गर्नुपर्ने बताएका थिए ।
केही दिनअगाडि हुम्लास्थित नेपाली भूमिमा चीनले निर्माण कार्य गरिरहेको समाचार बाहिरिएको थियो । यद्यपि, नेपाल सरकारले नेपाली भूमिमा चीनको तर्फबाट अतिक्रमण नभएको परराष्ट्रमन्त्री प्रदीप ज्ञवालीले स्पष्ट पार्नुभएको थियो भने चिनियाँ दूतावासले पनि एक विज्ञप्ति जारी गर्दै आफूले नेपालको भूभाग अतिक्रमण नगरेको बताएको थियो ।
चिनियाँ अधिकारीहरूले नेपाली भूमि नमिचिएको दाबी गरेका छन् । नेपाल चीन सीमावर्ती क्षेत्र हुम्लाको लिमीमा चीनले भूमि मिचेको भन्ने कुरा सही नभएको चिनियाँ सरकारी अधिकारीहरूको दाबी छ । अधिकारीहरूले हालै चीनले निर्माण गरेको नयाँ गाउँ चीनको अलिक बुराङ भन्ने स्थानमा पर्ने बताएका छन् । नेपाल–चीन सीमा क्षेत्रनजिकै चीनले भवन निर्माण सुरु गरेपछि नेपालमा विवाद सुरु भएको थियो ।
विगतमा भारतले सीमा अतिक्रमण गरेको विरोधमा प्रदर्शन हुँदै आएको भए पनि पछिल्लो समय चीनको समेत विरोधमा प्रदर्शन हुन थालेको छ । आजको हिमालय टाइम्स दैनिकमा खबर छ ।
