प्रधानमन्त्री संखुवासभामा, विभिन्न निमार्णकार्यको निरीक्षण

संखुवासभा । प्रधानमन्त्री केपी शर्मा ओलीले संखुवासभाको चीनसँग नाका जोडिएको भोटखोला गाउँपालिका १ मा पर्ने किमाथाङ्का नाकाको अवलोकन गरेका छन् ।

झण्डै एक वर्षअघि स्थापना भएको सीमा सुरक्षा पोस्ट (बीओपी)को निर्माणाधीन भवनका साथै भन्सार कार्यालय र सुख्खा बन्दरगाह लगायतबारे जानकारी लिएका छन् ।

साथै बहुचर्चित अरुण तेस्रो जलविद्युत आयोजनाको पनि निरीक्षण गरेका छन् । २०७४ वैशाख २८ गते भारतीय प्रधानमन्त्री नरेन्द्र मोदी र प्रधानमन्त्री ओलीले संयुक्तरुपमा अरुण तेस्रोको शिलान्यास गरेका थिए ।

यस्तै प्रधानमन्त्री ओलीले राष्ट्रिय गौरवको उत्तर दक्षिण कोशी राजमार्गको अनुगमन गर्ने, भोटखोला च्याम्ताङ राजमार्ग किमाथाङ्का छिचोल्नका लागि नेपाली सेनाले तयार गर्दै गरेको बंकर र अस्थायी क्याम्प लगायतको अनुगमन गर्ने कार्यक्रम छ ।

ओलीसँग भौतिक पूर्वाधार मन्त्री बसन्त नेम्वाङ, राष्ट्रिय सभा सांसद परशुराम मेघी गुरुङ, संखुवासभाका सांसद राजेन्द्रप्रसाद गौतम, प्रमुख राजनीतिक सल्लाहकार विष्णु रिमाल, स्वकीय सचिव राजेश बज्राचार्य र चिकित्सक दिब्या सिंह शाह पनि रहेका छन् ।

साथै प्रदेश १ का मुख्यमन्त्री शेरधन राई र सशस्त्र प्रहरी महानिरीक्षक शैलेन्द्र खनाल पनि प्रधानमन्त्रीको टोलीमा रहनुभएको खबरमा उल्लेख गरिएको छ ।

प्रधानमन्त्री ओली अनुगमन सकेर अपह्रान्न काठमाण्डौ फर्कने कार्यक्रम रहेको संखुवासभाका प्रमुख जिल्ला अधिकारी जीवनप्रसाद आचार्यले जानकारी दिए । ओली आज बिहान हेलिकप्टरमार्फत संखुवासभा आएका हुन् ।

मृगौला प्रत्यारोपण पछि प्रधानमन्त्री पहिलो मोफसल भ्रमणको क्रममा संखुवासभामा आएका हुन् ।