रामधुनी । चिसोसँगै कोरोना भाइरस र मौसमी रुघाखोकी बढ्न सक्ने भएकाले सचेत हुन चिकित्सकहरुले आग्रह गरेका छन । कोरोना भाइरसको सङ्क्रमणबाट बच्न अपनाइएका स्वास्थ्य मापदण्ड निरन्तर लागू गर्न सकेमा मौसमी रुघाखोकि लगायतका सरुवा रोगबाट जोगिन सकिने सरुवारोग विशेषज्ञ शेरबहादुर पुनले बताए ।
चिसो बढेसँगै मौसमी फ्लू, बालबालिकामा रोटा भाइरस र वयस्कमा कोरोना भाइरसको सङ्क्रमण देखिन सुरु हुन्छ । यो वर्ष मौसमी फ्लूका बिरामी पोहोर परारको तुलनामा कम देखिएका छन् । सामान्यतया भदौ देखि नेपालमा मौसमी फ्लूका बिरामी भेटिने गरेकोमा यसवर्ष कोरोना भाइरसको सङ्क्रमण भएका धेरै बिरामी भेटिएका छन् ।
चिसो बढ्दै गएपछि समूहमा बस्दा मौसमी फ्लू र कोरोना भाइरस झनै फैलने जोखिम रहेकाले सकेसम्म समूहमा नबस्न, अनिवार्य मास्क लगाउन, बेलाबेला साबुनपानीले मिचिमिची हात धुन, हात धुने अवस्था नभए स्यानिटाइजर लगाउन र व्यक्तिगत दूरी कायम गर्नेलगायतका स्वास्थ्य सुरक्षाका मापदण्ड पालना गर्न डाक्टरको सुझाव छ ।
