काठमाडौंको नयाँ बजारस्थित एक घरमा ग्यास सिलिन्डर पड्किएर आगलागी भएको छ । काठमाडौं महानगरपालिका वडा नम्बर १६ नयाँ बजारस्थित फलफूल चोकमा रहेको नीलकुमारी क्षेत्रीको घरमा ग्यास पड्किएर आगलागी भएको महानगरीय प्रहरी परिसर काठमाडौंका प्रवक्ता सोमेन्द्र सिंह राठौरले जानकारी दिए ।
नीलकुमारीको ससुरा केही दिन अघि बितेको र सो घरमा हाल काजकिरीयाकर्म भइरहेको थियो । बिहीबार बिहान ग्यास खोल्दा एकाएक लिक भएर आगलागी सुरु हुन पुगेको जानकारी भएको प्रहरीले जनाएको छ । प्रहरीका अनुसार घटनामा ११ जना घाइते भएका छन् भने त्यसमध्ये २ जनाको अवस्था गम्भीर रहेको छ । घाइतेहरुको पिपुल्स र मनमोहन अस्पतालमा उपचार भइरहेको राठौरले जानकारी दिए ।
चार वटा ग्यास सिलिन्डर विस्फोट हुँदा सो घरमा क्षति पुगेको छ भने वरपरका केही घरमा समेत सामान्य क्षति पुगेको र ग्यास विस्फोटपछि भएको आगलागी दमकलको सहायताले निभाइएको प्रहरीले जनाएको छ ।
