इटहरी । सुनसरी भोक्राहा नरसिहं ४ बस्ने नसरुदिन अन्सारीको डेढ बर्षीया छोरीको लडेर ज्यान गएको छ । आफ्नै घर अगाडी रहेको पानी जमेको बाझो खेतबारीमा नाबालिका रबिना खातुन लडी रहेको अवस्थामा स्थानीयले फेला पारेका थिए । तत्काल उपचारार्थ जिल्ला अस्पताल ईनरुवा लैजादै गर्दा मृत्यु भएको हो ।
यसैबिच झापा हल्दीबारी ३ जलथल बस्ने ४७ बर्षीय खड्क कुमार राईको करेन्ट लागेर मृत्यु भएको छ । खोलामा करेन्ट लगाई माछा मार्ने क्रममा राई आफैलाई करेन्ट लागेको जिल्ला प्रहरी कार्यालय झापाले जनाएको छ । करेन्ट लागेर वेहोस भएका राईको साई पाथीभरा अस्पताल भद्रपुरमा उपचार क्रमममा ज्यान गएको हो ।
यस्तै सुनसरी देवानगंज २ का ३० बर्षीय सन्त कुमार मेहेताको चट्याङ लागेर ज्यान गएको छ । घर नजिकै खेतमा सनपाट पानीमा डुबाउने क्रममा मेहेतालाई चट्याङले लागेको जिल्ला प्रहरी कार्यालय सुनसरीले जनाएको छ । चट्याङले लागेर बेहोस भएका मेहतालाई उपचारार्थ लैजादै गर्दा बाटोमै ज्यान गएको प्रहरीले जनाएको छ ।
