इटहरी । नेपालमा आज एकै दिन थप ९२७ जना कोरोना भाइरस (कोभिड–१९) संक्रमित थपिएका छन् ।
विभिन्न ३९ प्रयोगशालामा गरिएको १० हजार २२९ जनाको परीक्षणमा थप ९ सय २७ जनामा कोरोना संक्रमण पुष्टि भएको स्वास्थ्य मन्त्रालयका प्रवक्ता प्रा.डा. जागेश्वर गौतमले जानकारी दिए ।
यससँगै कोरोना संक्रमितको संख्या ३६ हजार ४६५ पुगेको छ । कुल संक्रमितमध्ये सक्रिय संक्रमितको संख्या १६ हजार १९ रहेको छ । यता, नेपालमा कोरोनामुक्त हुनेको संख्या २० हजार २४२ पुगेको छ । शुक्रबार थप १६९ जना कोरोना संक्रमित निको भएका छन् ।
कोभिड–१९ संक्रमणबाट ज्यान गुमाउनेको संख्या १९५ पुगेको छ । शुक्रबार थप १२ जनाको मृत्यु भएसँगै संक्रमणको कारण ज्यान गुमाउनेको संख्या १९५ पुगेको मन्त्रालयले जानकारी दिएको छ ।
मोरङका २ जना, भक्तपुर र मकवानपुरका एक एक जना महिलाको मृत्यु भएको छ । यस्तै उदयपुर, पर्सा, धनुषा, सिरहा, झापा, चितवन, कास्की र रुपन्देहीका एक(एक जना पुरुषको ज्यान गएको छ ।
